Recently Watched

மண் வாசனை. இசை ஞானியின் இசையை பற்றி வாழ் நாள் முழுவதும் நாம் பேசிகொண்டிருக்கையில் என்னை மிகவும் கவர்ந்த திரைக்காவியத்தைப்பற்றி ஓரிரு வார்த்தைகள். தமிழ்நாடு என்றால் சென்னையும் அதனை சார்ந்த பகுதிகளும் மட்டுமே என்று நம்பிய என் சிறு வயது மூளைக்குள், தமிழ்நாடும் தமிழ்நாட்டின் மக்களையும் அடையாளம் காட்டியவர் திரு. பாரதிராஜா அவர்கள். தமிழ் என்பது தமிழ் பாடப்புத்தகமும் கோனார் தமிழ் உரை மட்டுமே என்று நம்பிய எனக்கு, தமிழ் மொழியின் வட்டார வழக்கையும், தமிழ் மொழியின் அழகையும் ஆழத்தையும் எனக்கு உணர வைத்தவரும் பாரதிராஜா அவர்களே. மலைச்சாமி, சப்பாணி, பரட்டை, குருவம்மா, பொன்னாத்தா, மண்வாசனை கெழவி, சின்னப்பதாஸ், பாலுத்தேவர் போன்றவர்கள் தமிழ் நாட்டின் ஆணிவேர் என்று பறைசாற்றியவரும் அவரே. தமிழ் படங்களின் மேல் ஒரு காதல் உண்டாவதற்கு மிக முக்கிய காரணம் என் பாரதிராஜா. என் இனிய தமிழ் மக்களே என்று அவரின் கம்பீர குரலில் படத்தை துவக்கும் விதத்திற்காகவே அவர் படங்களை பார்க்க பல முறை சென்றிருக்கிறேன். அந்த குரலில் தான் எத்தனை மண் வாசம்.

காளியாத்தா கோவில் குங்குமத்தோட இந்த கரிசலபட்டி மண்ணோட பவுர் (இந்த வார்த்தையை என்ன வென்று சொல்லுவது!) ஜாஸ்தி!

பள்ளி வாத்தியாரை கிராமத்திற்குள் அன்போடு வரவேற்ற அவள் யார்? கவிஞர் வைரமுத்துவின் அருமையான புது கவிதை பாரதிராஜாவின் மயக்கும் குரலில்.
அவள் யார், யார் அவள்? இந்த கிராமத்து நுழை வாயிலில் என்னை வரவேற்க வந்திருந்த வானவில்லா?
என்றும் விடியாத இருளை நான் இன்றுதான் பார்த்தேன். நான் அவள் கூந்தலை சொன்னேன்.
இரண்டு சந்த்ரோதயங்களை இன்றுதான் பார்த்தேன். நான் அவள் கண்களை சொன்னேன்.
கிளி வந்து இன்னும் கொத்தி செல்லாத அத்தி பழங்கள். நான் அவள் இதழ்களை சொன்னேன்.
பளிங்கு தரையில் அள்ளி இறைத்த வெள்ளி காசுகள். ஹ..ஹா.. நான் அவள் சிரிப்பை சொன்னேன்.
போகப்போக என் டைரியின் எழுதப்படாத பக்கங்களில் எல்லாம் இதைவிட இன்னும் சொல்வேன்.

வினு சக்ரவர்த்தி. அருமையான நடிகர். திரையில் அவரை பார்க்கும் பொழுது பிறக்கும் ஒரு புத்துணர்வே தனிதான்.
வி: நானும் வந்ததுலேர்ந்து கேக்கனும்னு இருந்தேன். ஏன்யா கோனவாசி (என்ன ஒரு பெயர்!) என் பையன் கொடி ஏத்த கொடி வாங்கி கொடுத்தா, மேலயும் கீழையும் செவப்பும் பச்சையும் இருந்தா போதாது, நடுவுல அசோக சக்கரம் வேணும்னு கேட்டியாமே. சக்கரம் இல்லன்னா பறக்க மாட்டேன்னு கொடி வந்து உன்கிட்ட சொல்லிச்சா :லொள்:
வாத்தி: நானா அப்படி சொல்லலீங்க கவெர்மெண்ட்ல அப்படி ஒரு ரூல் இருக்கு.
வி: இது ஒன்னும் கவேர்மென்ட் பள்ளிக்கூடம் இல்லைய்யா, கரெஸ்பாண்ட்டு பள்ளிக்கூடம் :லொள்: (அந்த கரெஸ்பாண்ட்டு சொல் என்னை வெகுவாக கவர்ந்த ஒன்று. ஏனென்றால், ஆங்கிலத்திலேயே கேட்டு கேட்டு பழகிப்போன அந்த சொல், தமிழில் புதுப்பொலிவு பெற்றதை மறக்க முடியாது).

காந்திமதி. என்னை மிகவும் கவர்ந்த குணசித்திர நடிகை. இவரை மாதிரி நடிக்க இன்று எவரும் இல்லை.
கா: அடியே ஊசி வெடி பாசி வெடி விருதுநகர் யான வெடி கேட்டுக்கடி ருக்கு நான் வத்தலகுண்டு தொக்குன்னு யாரடி அவ என் வீட்டுக்குள்ள வந்து என் பொம்பளையை எல்லாம் அதிகாரம் பண்றவ? (என்ன ஒரு அழகு)
ரே : ஹான்...கொதிக்கிற கொழம்பு சட்டியும் அதுக்குள்ள வேகர கோழியையும் கேளு ஒறவென்ன உருடென்னன்னு சொல்லும். நாளைக்கு நான் குத்த வெச்சுட்டா குடுச கட்ட உன் மவந்தான் வரணும் அனுப்பி வய்யி
கா : ஹான்...மத்தாளம் கொட்டுதாம் மாமரத்து மயிலு மச்சானை தேடுதாம் பூ மரத்து குயிலு (காந்திதமதி 'குயிலை' எப்படி உச்சரிக்கிறார் பாருங்கள்)

இப்படி ஆயிரமாயிரம் தெறிக்கும் வசனங்கள், நம்மை அறியாமல் நம்மை கரிசல்பட்டிக்கே அழைத்து செல்லும். பஞ்சு அருணாசலம் அவர்களுக்கு கோடானு கோடி நன்றிகள். என் சிறு வயதில் இந்த படங்களை பார்க்கும் வரை இப்படி எல்லாம் யதார்த்தமாக கவித்துவமாக தமிழ் பேசுவார்கள் என்று எனக்கு தெரியாது. இப்படி ஆயிரமாயிரம் வட்டார வழக்கு இருக்கிறது என்றும் எனக்கு தெரியாது. படத்தை பார்க்கும் பொழுது ஏற்பட்ட அந்த பரவச நிலையை வார்த்தைகளால் சொல்ல முடியாது. இவை எல்லாவற்றிக்கும் மேலே இந்த நெஞ்சார்ந்த வசனத்திற்கு பின்னால் இசை ஞானியின் இசை வசனத்திற்கும் காட்சிக்கும் உயிர் ஊட்டுவதை கேட்க ஆனந்தம் பரமானந்தம். அடி மூக்கி அர மூக்கம்மா மாதிரி சுகமான இதமான பாடல்கள். அவ்வளவும் கிராமத்து மண் வாசம். இப்பொழுதும் இம்மாதிரி கிராமத்து படங்கள் வருகின்றன ஆனால் மண்ணின் மணம் அவற்றில் அவ்வளவாக இல்லை. நடிப்பவர்களின் திறமை இயற்கையாக இல்லை. எப்பொழுதும் வன்முறை, கொலை, குத்து என்று கதைக்களம் மனித நேயத்திற்கு அப்பால் சென்றுவிட்டது. இசையோ படத்திற்கு ஒட்டாமல் வேறு ஒரு தளத்திற்கு சென்று தடம் புரள்கிறது. இப்படி கதையுடன் இசை ஒன்று சேர்ந்தால், இன்று கிண்டல் செய்கிறார்கள். ஒன்று சேராவிட்டால் புதுமை என்கிறார்கள். காலத்தின் கட்டாயம். நல்லது நடந்தால் சரி. பாரதிராஜா மீண்டும் மண் வாசனையுடன் இசை ஞானியின் இசைத்தென்றல் வீச ஒரு படம் தருவாரா?